Paisaxes cerámicas da Alameda de Pontevedra

Escena popular con cruceiro e parra

Servindo de contrapunto no seu extremo á Casa do Concello, o longo paseo da Alameda de Pontevedra rematou -nos anos vinte- nunha escaleira con murais cerámicos do pintor Carlos Sobrino

Estes barros vidriados, ou azulexos trianeiros, foron  moi empregados como cerámica artística en moitos xardíns privados e parques públicos de España na primeira metade do século XX.

A fábrica Mensaque Rodríguez y Cía foi a  encargada de cocelas pinturas de Carlos Sobrino, que ideou un programa iconográfico netamente galego, con postais guarnecidas en grosos marcos, que recollen as paisaxes monumentais máis senlleiras do noso territorio: Combarro, Monterrei, a muralla romana de Lugo, as prazas de Pontevedra...

Estes cadros están circunscritos ao semicírculo do muro de contención da alameda pontevedresa, convertindo un espazo, inicialmente residual do xardín, en auténtico expositor turístico que canta as belezas da terra.

Imaxes costumbristas eficientes por pintorescas que retratan ao pobo na súa vida cotiá. Imaxes serenas tan correctas como pouco vangardistas, preciosistas na súa execución sobre todo no acabado seu brilante, que ofrece a superficie esmaltada cerámica.

Os lenzos de barro foron restaurados en 2010 polo Concello de Pontevedra, podendo pois agora achegarmonos mellor á súa beleza e  delicado engado.

Bibliografía:
LUQUE MENSAQUE, B., (2012), La cerámica trianera en el jardín de Sorolla, en Pieza del mes de octubre. Museo Sorolla